Þorsteinn Gunnarsson rektor Háskólans á Akureyri segir hugmyndir vinnuhóps um sameiningu háskóla aðför að háskólamenntun á landsbyggðinni. Tillögurnar voru ræddar á fundi háskólaráðs HA í dag. “Það sem við setjum helst fyrir okkur er að þessar tillögur eru allt of höfuðborgarmiðaðar. Í raun og veru er verið að tala um að leggja niður sjálfstæða háskóla á landsbyggðinni og setja upp fjóra háskóla á höfuðborgarsvæðinu,” sagði Þorsteinn í samtali við Akureyri.net síðdegis. Vinnuhópurinn starfaði á vegum Menntamálaráðuneytisins.

Í fréttatilkynningu frá Háskólaráði segir að upplýstri umræðu um vísindi og háskólamál sé fagnað og að ráðið taki undir ýmis sjónarmið sem koma fram í þessum úttektum, sérstaklega hvað varðar aukna samvinnu milli háskóla. Ráðið er þó mótfallið hugmyndum um að Háskólinn á Akureyri verði gerður að útibúi frá háskóla með höfuðstöðvar í Reykjavík og telur skorta fullnægjandi rökstuðning fyrir slíkum hugleiðingum.

Lesa meira »
(Engin ummæli)

Fegurðarsamkeppni Íslands fór fram í Reykjavík um helgina. Kristín Lea vinkona mín sem sigraði keppnina Ungfrú Norðurland í Sjallanum í síðasta mánuði kom heim með þrjá titla úr keppninni. Hún var kjörin Miss Elite stúlkan, Valencia stúlkan sem og vinsælasta stúlka keppninnar. Þá var Kristín valin ljósmyndafyrirsæta keppninnar.

Engin stúlka fékk fleiri titla í keppninni í ár! Til hamingju Kristín Lea

Lesa meira »
(Engin ummæli)

Nokkuð líklegt má telja að fjöldamet hafi verið slegin í Samkomuhúsinu á Akureyri um helgina þegar vorsýningar Point dans stúdíós fóru fram. Alls komu rúmlega 400 nemendur fram á sviði gamla leikhússins og þá voru þéttskipaðir bekkir á öllum sex sýningum helgarinnar og raunar var aðsóknin það mikil að margir máttu standa.

Sýningin var öll hin glæsilegasta og góður vitnisburður þess starfs sem unnið hefur verið í dansskólanum í vetur. Sigyn Blöndal, stofnandi skólans segir undirbúning sýningarinnar hafa staðið frá því í desember á síðasta ári en nemendurnir lögðu undir sig leikhúsið um síðustu helgi og voru stífar æfingar alla vikuna. Myndir frá fyrri sýningardeginum eru komnar á vefinn og eru myndir frá seinni sýningardeginum væntanlegar hingað í kvöld.

Lesa meira »
(Engin ummæli)

Páll Stefánsson ljósmyndari heldur fyrirlestur í Kvos Menntaskólans á Akureyri á morgun, fimmtudaginn 7. maí kl 17:15. Fyrirlesturinn er öllum opinn og aðgangur er ókeypis. Það eru Sigurjón Svanbergsson og félagsmenn í Áhugaljósmyndaraklúbbi Akureyrar sem standa að því að fá ljósmyndarann norður og segir Sigurjón það mikinn heiður, enda sé Páll einn af þekktustu ljósmyndurum Íslands og mikið átrúnaðargoð fyrir áhugaljósmyndara. Páll hefur unnið bæði hér á landi og erlendis og er einn af ljósmyndurum tímaritsins Iceland Review.

Á fyrirlestrinum mun Páll meðal annars sýna myndir sem hann hefur verið að taka í Afríku en eftir fyrirlesturinn gefst gestum kostur á að leggja spurningar fyrir ljósmyndara. Þetta er eitthvað sem enginn áhugaljósmyndari á Akureyri ætti að láta fram hjá sér fara.

Nánar má lesa um starfsemi Áhugaljósmyndaraklúbbs Akureyrar á vefsíðunni www.ljosmynd.net

Lesa meira »
(Engin ummæli)

Um næstu helgi opnar Kjartan Sigtrygsson sýningu á teikningum sínum í Populus tremula. Sýningin hefst 9. Maí klukkan 14:00 og verður einnig opin á sunnudag. Aðeins verður sýnt þessa einu helgi. Kjartan útskrifaðist úr myndlistardeild Listaháskóla Íslands árið 2006 en hann tók nýlega þátt í samsýningu í Gallerí Syrpu í Hafnarfirði og hefur einnig haldið einkasýningu á Café Karólínu á Akureyri.

Lesa meira »
(Engin ummæli)