Móðir mín hafði fyrir mér vísu í gær sem flestir fræðimenn hafa eignað Jóni Þorgeirssyni, presti á Hjaltabakka. Vísan var samin um Jón Benediktsson sýslumann í Þingeyjarsýslum og er svo haglega saman sett að hægt er að lesa hana bæði áfram og aftur á bak og heldur hún á báða vegu formi en breytir þó alfarið um merkingu, eftir því á hvorn vegin hún er lesin.

Grundar dóma, hvergi hann
hallar réttu máli.
Stundar sóma, aldrei ann
illu pretta táli.

Þegar henni er svo við snúið hljómar hún svo:

Táli pretta illu ann,
aldrei sóma stundar.
Máli réttu hallar hann,
hvergi dóma grundar.

Vísur og kvæði samin í þessum hætti nefnast sléttubönd. Um sléttubönd og fleiri bragarhætti má lesa á bragfræðivef Halls B. Reynissonar konrektors og fyrrum kennara míns í Laugaskóla.

Lesa meira »
(Engin ummæli)

Spurning að fara að sofa…

Lesa meira »
(Engin ummæli)

Nokkrum dögum eftir að ég byrjaði að vinna hjá Fréttablaðinu vorið 2005 var ég beðinn að sitja fyrir á mynd sem sýndi hnakkann á manni við tölvuskjá. Vantaði blaðið svona mynd til að nota með frétt um könnun á vinnuhögum fólks. Mynd þessi lenti í kjölfarið í myndasafni 365 miðla, sem er útgáfufélag Fréttablaðsins og hefur birst í ýmsum miðlum síðan. Ég hef til dæmis brotist inn í heimabanka í frétt hjá DV, notað stolnar kreditkortaupplýsingar í frétt Fréttablaðsins, ég hef verið tölvufíkill, háður leikjum, stundað óhófleg viðskipti á ebay og svo mætti lengi telja. Nú síðast í dag kom hnakkinn á mér með frétt, það var á vísi.is en þar er ég 18 ára tölvuþrjótur frá Nýja-Sjálandi. Ég held ég ætti að fara að rukka 365 miðla þar sem þessir tölvuglæpir fara að nálgast fullt starf.

Átján ára tölvuþrjótur sýknaður

Lesa meira »
(Engin ummæli)

Stjórnmálaskýrendur vestanhafs hafa undafarið velt fyrir sér hvernig George W. Bush bandaríkjaforseti ljúki forsetatíð sinni, er hann lætur af embætti 20. janúar næstkomandi. Líklegt er að úrslit forsetakosninganna í nóvember ráði miklu þar um. Þannig muni líkur á innrás Bandaríkjamanna í Íran til að mynda aukast verulega verði Barack Obama, forsetaframbjóðandi demókrata, kjörinn forseti. Ástæðan er sú að Bush „treystir“ ekki Obama til að ganga í verkið. Bush situr tæpa þrjá mánuði í embætti eftir að ljóst verður hver eftirmaður hans verður og hefur hann á þeim tíma óskert forsetavald.

Bandarísk stjórnvöld hafa um langt skeið undirbúið jarðveginn fyrir hugsanlega árás á Íran. Sú aukna spenna sem orðið hefur í samskiptum ríkjanna undanfarnar vikur hefur síður en svo dregið úr líkum á innrás. Ljóst er John McCain deilir skoðunum með Bush hvað varðar Íran og sem gömul stríðskempa þætti honum eflaust ekki leiðinlegt að leiða þjóð sína í enn eitt stríðið. Svo virðist sem þetta sé orðin einhverskonar þráhyggja þeirra Bush og McCain, en sá síðarnefndi fagnaði á dögunum auknum útflutningi á sígarettum frá Bandaríkjunum til Íran og sagði það hjálpa til við að drepa Írani. Sýna ummæli sem þessi hversu barnslegar hvatir liggja að baki. Af ummælum sem þessum má ráða að helsta markmiðið sé að drepa sem flesta.

Hinn frambjóðandinn, Barack Obama, er á allt annari blaðsíðu. Hann hefur lýst þeirri skoðun sinni að tilraunir Írana með langdrægar eldflaugar auki enn á þörf þess að fram fari viðræður milli þjóðanna. Viðræður virðast hinsvegar lítt höfða til hörðustu repúblikana sem aðhyllast stefnu sem kalla mætti „sprengja fyrst – spyrja svo“.

Allar þessar vangaveltur og óstöðugleiki hafa svo þau áhrif að enn hækkar olíuverð á heimsmarkaði. Það varð reyndar til þess að fólk í hinum vestræna heimi sem áður hafði lítinn áhuga á alþjóðamálum lætur sig þau nú varða. Enda er þetta þá farið að snerta það sjálft en ekki einungis fréttir frá fjarlægu heimshorni sem birtast á flatskjánum meðan fjölskyldan borðar kvöldverðinn.

Að öllu þessu söguðu er einnig vert að horfa aðeins í tölur. Tölur búa oft yfir miklum sannleik þó ekki sé hægt að byggja á þeim eingöngu. Það er engu að síður sérstakt að ríki sem býr yfir um 5000 kjarnavopnum, hefur gert vel yfir þúsund tilraunir með kjarnavopn, auk þess að vera eina ríkið í heiminum sem beitt hefur slíkum vopnum í hernaði, skuli vera það ríki sem talar um hina miklu ógn sem stafi af Írönum. Enn hefur ekki verið sannað að unnið sé að gerð kjarnavopna í landinu. Raunar hafa ráðgjafar Bush sagt honum að þvert á móti sé ekki unnið að slíkri þróun. Það er til lítils að leita ráða sérfræðinga ef aðeins á að hlusta á þá þegar maður er þeim sammála. En ef markmiðið er það eitt að drepa Írani þá er það kannski akkúrat leiðin.

Lesa meira »
(Engin ummæli)

Gleðið, gleði.. Var að bóka mér flug til London áðan og ætla að eyða bróðurparti ágústmánaðar á flakki um sveitir og borgir Bretlandseyja. Ætla meðal annars að heimsækja minn kæra vin Atla Fanndal í Bournemouth á suðurströndinni. Stefni líka að því að skoða Stonehenge, en þangað hef ég aldrei komið. Þó ég hafi farið þrisvar til Bretlands á síðasta ári þá hef ég ekki farið út fyrir London síðan ég ferðaðist um Bretland með foreldrum mínum sumarið 1990, þá sex ára gamall. Þá var Freddie Mercury enn í fullu fjöri en ég hafði mun meira dálæti á íslensku barnastjörnunni Kötlu Maríu. Góðir tímar!

Lesa meira »
(Engin ummæli)