Kolbrún Halldórsdóttir, þingkona Vinstri grænna, beindi í vikunni athyglisverðri fyrirspurn til heilbrigðisráðherra. Þar spurði þingkonan út í þann sið að nýfæddir drengir séu klæddir bláum fötum og nýfæddar stúlkur bleikum. Í fyrstu fannst mér þessi fyrirspurn frekar vitlaus. Sjálfur var ég klæddur í blátt, en ég vil hins vegar ekki að kyn mitt geri það að verkum að ég geti ekki valið að klæðast bleiku. Þegar ég fór að leita að frekari mótrökum í höfði mér létu þau hins vegar standa á sér.

Ég get í raun ekki séð af hverju það þarf að aðgreina kynin með þessum hætti við fæðingu. Þarna er um einstaklinga að ræða og væri því nær að hægt væri að velja úr öllum regnbogans litum. Þar greinir okkur Kolbrúnu reyndar á, því hún spyr ráðherra hvort ekki sé nær að klæða börn kynlausum lit.

Ég vil að róið sé að því öllum árum að útrýma launamun og jafna stöðu kynjanna í samfélaginu. Ég er hins vegar ekki á því að það verði gert með því að afmá öll einkenni kynjanna. Þessi hugmynd um hið kynlausa samfélag höfðar ekki til mín.

Ég er hrifinn af fjölbreytni og á þeim forsendum finnst mér í lagi að endurskoða litaval á vöggustofum. Ég tel að það gæti lífgað verulega upp á fæðingardeildir ef foreldrar fengju að velja barnaföt eftir eigin höfði. Þannig kemur líka ný aðgreining því auðvelt er að benda afa og ömmu á vögguna með grænklædda barninu eða því rauðklædda. Til að útrýma launamun kynjanna er hins vegar þörf á breyttu hugarfari, á öllum stigum þjóðfélagsins. Það verður ekki gert með því að móta alla í sama form. Það verður gert með því að útrýma launaleynd og að þingmenn eins og Kolbrún verði duglegir að halda merkjum jafnréttis á lofti, þannig að gagn verði af. Ég ætla því að bregða mér í bleika flík í dag í nafni frelsis einstaklingsins og jafnréttis kynjanna.

Lesa meira »
(Engin ummæli)

Mér líður svakalega vel. Ég var að labba niðri í bæ í dag og varð vitni að því þegar maður nokkur bakkaði á kyrrstæðan bíl þegar hann var að fara út úr bílastæði. Bílstjórinn gerði sig þegar líklegan til að keyra í burtu en ég gaf honum merki um að ég hefði séð til hans og lét hann sjá að ég skrifaði niður bílnúmerið. Hann stoppaði því og ég benti honum á að fara inn í búðina sem bíllinn var fyrir utan og spyrja um eigandann. Þegar hann var farinn inn í búðina var ég þess fullviss að málið væri komið í góðan farveg og gekk leiðar minnar. Örstuttu síðar brunaði bíllinn framhjá mér og mér þótti hann hafa verið heldur snöggur að afgreiða þetta mál. Ég snéri því við og rölti í búðina. Þar komst ég að því að maðurinn hafði stungið inn hausnum og spurt hvort einhver ætti bílinn fyrir utan. Svo var ekki og sagðist maðurinn þá hafa rekist aðeins í hann en ekkert sæi á honum. Staðreyndin var reyndar sú að framhlið kyrrstæða bílsins var næstum alveg laus af. Ég ákvað því í ljósi þess að vera bæði vitni og með bílnúmerið undir höndum að bíða bara við kyrrstæða bílinn eftir eigandanum. Sá var heldur sæll að ég skyldi hafa lagt þetta á mig til að létta sér daginn og ég var alsáttur að hafa verið hetja dagsins.

Annars var erindi mitt í miðbæinn að kaupa mér spennubreyti. Nú get ég farið að glamra á hljómborðið mitt aftur á kvöldin. Gaman gaman!

Lesa meira »
(Engin ummæli)

Um helgina rakst ég á frábært fyrirbæri á netinu sem nefnist Vefþulan. Þetta er íslenskur talgervill sem þulan Ragnheiður Clausen hefur ljáð rödd sína. Þetta er eitt flottasta framtak sem ég hef séð í vefmálum hérlendis lengi.

Þegar ég fór að skoða þuluna komst ég að því að hægt er að hlusta á allt sem netverjar hafa látið hana segja. Eftir að hafa hlustað á nokkrar færslur sá ég að mikill hópur netverja er illa kynferðislega bældur. Stór hluti þess sem þulan var látin segja var nefnilega á einhvern hátt klámtengt og margt hvert hreinlega viðbjóðslegt. Ég ákvað að búa til topplista af súrustu ræðum Vefþulunnar og einnig nokkrum sem fóru langt yfir strikið. Allt saman mjög spes og sýnir vel hvað margt fólk er illa brenglað!

Það kemur eflaust engum á óvart að þetta skuli gerast. Það er í raun sama hvað fólk gerir í góðri trú, alltaf mun einhver misnota það á einhvern hátt. Vefþulan er frábært framtak og vonandi að það verði meira gagna af henni í framtíðinni en þetta. Þó vissulega sé sumt þarna fyndið geri ég ráð fyrir að þeir sem hana hönnuðu hafi haft eitthvað annað og betra í huga.

Lesa meira »
(Engin ummæli)

Nafnið mitt var á forsíðu DV um helgina. Sem betur fer var það ekki í stóru stríðsfyrirsagnaletri heldur agnarsmátt neðarlega á síðunni. Enda hef ég ekki framið neinn glæp, stungið undan pening eða gert nokkuð til að verðskulda stríðsfyrirsögn. Ég tók bara eina mynd og fékk nafnið mitt við hana. Samt skrítið að hafa nafnið sitt framan á DV.

Lesa meira »
(Engin ummæli)

Morgunblaðið greindi frá því í vikunni að Geir Árdal, bóndi í Dæli væri að leggja ljósleiðara á eigin kostnað heim til sín þar sem netsamband hefur ekki verið gott þar á bæ hingað til. Þetta er enn ein sönnun þess að illa var staðið að einkavæðingu Landsímans á sínum tíma.

Þegar farið var í einkavæðinguna ályktaði ég um málið og líkti því við að þjóðvegir landsins væru einkavæddir og markaðslögmálið látið gilda. Það sér það hver maður að þá væri ekki von á miklum vegaúrbótum til fámennari staða. Það er mikið réttindamál fyrir landsbyggðarfólk að njóta sömu kosta í tengingum og fólk á höfuðborgarsvæðinu og því slæmur dómur yfir þessari ákvörðun að nú sé fólk farið að ráðast í lagningu ljósleiðara á eigin kostnað.

Annars þekki ég tvö af Dælisbörnum og veit að það er kraftmikið fólk sem þar býr. Þetta kemur því ekkert svo á óvart. Ég óska þeim Hannesi og Sigríði bara góðrar skemmtunar, en vona að þau fái ekki víðáttubrjálæði þegar verða komnar fleiri en ein sjónvarpsstöð í tækið.

Leggur eigin ljósleiðara

Lesa meira »
(Engin ummæli)