Í gærkvöldi varð 17 ára piltur tveimur mönnum að bana í umferðinni. Mað hraðakstri sínum drap hann ökumann sendiferðabíls sem hann mætti og farþega hans. Ökumaðurinn var innan við fertugt og farþeginn var 22 ára. Ég held að nú ætti að taka bílprófsaldurinn til alvarlegrar skoðunar.

Ég tel að réttast væri að við bílprófi færi fram þroskamat þar sem athugað er hvort viðkomandi hefur nægan þroska til að axla þá ábyrgð sem fylgir því að aka bifreið. Mér finnst allt of oft gleymast að þetta er ekki bara spurning um hina ungu ökumenn heldur snertir þetta alla í umferðinni. Allt of margir hafa misst einhvern sem þeim er kærkominn, til þess eins að sautján ára piltur geti sýnt hvað hann kemst hratt með nýpressar ökuskírteini í vasanum.

Tengdar fréttir:

„Hraðakstur var ástæðan fyrir banaslysinu á Garðskagavegi í gærkvöld. Lögreglan í Keflavík segir að vitni hafi staðfest að hraðakstur sautján ára ökumanns á fólksbíl hafi valdið árekstrinum við sendiferðabíl um klukkan sjö í gær. Lést ökumaður sendiferðabílsins, maður á fertugsaldri, á staðnum en tuttugu og tveggja ára farþegi hans og sautján ára ökumaður fólksbílsins voru fluttir alvarlega slasaðir á Landspítala – háskólasjúkrahús í Reykjavík og lést farþeginn skömmu eftir komuna á slysadeild, að sögn læknis. Sautján ára ökumaðurinn var fluttur á gjörgæsludeild en er ekki í lífshættu.“
Mbl.is 17. ágúst 2006

„Sautján ára piltur mældist á 141 kílómetra hraða á Reykjanesbrautinni við Stekkjarbakka um ellefuleytið á sunnudagskvöld. Leyfilegur hámarkshraði á þessum stað er sjötíu kílómetrar á klukkustund. Ökumaður framvísaði ökuskírteini sínu, sem var ellefu daga gamalt.“
Fréttablaðið 8. ágúst 2006

„Ungur ökumaður, 17 ára gamall var stöðvaður eftir að ökutæki hans var mælt á 149 km hraða þar sem hann ók eftir Suðurlandsvegi til vesturs rétt austan við Hvolsvöll en hann var að koma af dansleik í félagsheimilinu Gunnarshólma í Landeyjum með fullan bíl af farþegum í nótt.“
Morgunblaðið 29. apríl 2006

„Lögreglan á Akranesi stöðvaði ungan ökumann fyrir of hraðan akstur á Kjalarnesi fyrr í dag. Sá reyndist hafa ekið bifreið sinni á 170 kílómetra hraða þar sem 90 km er hámarkshraði.“
Morgunblaðið 18. febrúar 2006

Lesa meira »
(Engin ummæli)

Ég skrifaði frétt um fornleifauppgröft að Hrísbrú í Mosfellsdal í liðinni viku og ákvað að heimsækja staðinn til að kynna mér betur viðfangsefnið. Á Hrísbrú hitti ég fyrir Jesse Byock, prófessor í norrænni fornleifafræði við Háskólann í Kali­forníu, en hann hefur stjórnað uppgreftinum á Hrísbrú þau sjö ár sem þar hefur verið grafið. Í sumar er verið að grafa þar upp langhús sem er að líkindum frá tíundu öld en áður hafa fundist kirkja og grafir að kristnum og heiðnum sið.

Á leiðinni frá Hrísbrú mætti ég þessum krökkum sem höfðu brugðið sér í útreiðartúr og smellti einni af.

Lesa meira »
(Engin ummæli)

Í tilefni af Gay pride brá ég mér aðeins í bæinn með myndavélina áðan. Það var mikið fjölmenni og þó sólin léti ekki sjá sig þá skorti ekki á litadýrðina.

Myndir:
Gay pride 2006 (tekið laugardaginn 12. ágúst)

Lesa meira »
(Engin ummæli)

Ég fór heim til Lauga um helgina á landsmót ungmennafélaganna sem var hin besta skemmtun. Hér eru nokkrar myndir frá mótinu.

Myndir:
Landsmót ungmennafélaganna (tekið sunnudaginn 6. ágúst)

Lesa meira »
(Engin ummæli)

Undanfarna mánuði hef ég orðið fyrir mjög auknu áreiti betlara af ýmsum stærðum og gerðum. Nú er svo komið að ég svara upp undir 10 símtölum á viku þar sem ég er beðinn að styrkja ýmis málefni sem eru hvert öðru brýnna. Ég er alveg ágætis maður en allt á sín takmörk.

Ég hef því ákveðið að láta setja rauðan kassa við nafn mitt í næstu símaskrá. Þetta er hins vegar ekki allt. Síðan ég kom hingað til Reykjavíkur hef ég einngi orðið fyrir áreiti betlaranna á götum úti. Því varpaði ég fram þeirri hugmynd í hóp vinnufélaga minna að búinn yrði til bolur með samskonar merkingu og notaðar eru í símaskránni. Þá loks fengi maður frið.

Stórvinur minn Arnór Bogason gekk í málið og hannaði bolinn og munum við kumpánar selja áhugasömum bolina gegn vægu verði. Spurning hvort við gerum það á götum úti og verðum eins ógeðslega uppáþrengjandi og þeir sem vilja ólmir að maður fái sér lífeyrissparnað?

Nýjar myndir:
Næturbrölt með nýja myndavél (tekið aðfaranótt og að morgni 2. ágúst)

Lesa meira »
(Engin ummæli)