Í gærnótt gerðu Ísraelar árás á Líbanska þorpið Kana. Í árásinni létust að minnsta kosti 34 saklaus börn. Það er ekkert sem réttlætir morð á saklausu fólki og börnum.
(Mynd/Associated Press)

Lesa meira »
(Engin ummæli)

Eftir fjóra tíma ætla ég að vakna til að labba af stað niður í Vatnsmýri. Ég er nefnilega að fljúga norður í fyrramálið. Ég held að ég fari hvað og hverju að sofa en mig langaði bara til að segja ykkur að ég væri að fara norður. Svo ætla ég að tileinka þetta stutta blogg tveimur manneskjum. Fyrstan ber að nefna dyggasta lesanda síðunnar, Völund vin minn og fyrrum starfsfélaga. Hann er í skóla á Nýja sjálandi og hefur heimsótt síðuna 40 sinnum frá því að hún byrjaði, en það eru heil 2 prósent af heimsóknunum. Þar sem ég er með teljara sem segir frá hvaða landi ég fæ heimsóknir þá er auðvelt að sjá hvenær hann er að kíkja í kotið Hin manneskjan sem ég tileinka þetta blogg er Magga vinkona mín sem vildi bara athuga hvort kolin væru heit og er núna með brunasár á hendinni og getur ekki unnið. Vá hvað ég er heppinn að þekkja svona sniðugt fólk. Góða nóttt.

Lesa meira »
(Engin ummæli)

Vegna hagstæðra innkaupa hef ég nú töluvert magn af fjósadraugum til sölu. Fyrir áhugasama hef ég sett upp vefverslun þar sem hægt að panta. Um að gera að smella sér á einn, þeir sem hafa keypt af mér eru mjög ánægðir með sína og gefa hiklaust meðmæli.

Fjósadraugar eru tilvaldir í fjósið, á skrifstofuna, í stofuna eða í útileguna. Henta hvar sem er.

Vefverslun fjósadrauganna

Lesa meira »
(Engin ummæli)

Í veikindum mínum hef ég haft mikinn tíma til að horfa á sjónvarp, eitthvað sem annars mætir oftast afgangi í lífi mínu. Í gær ákvað ég að horfa á sjónvarpsstöðina Sirkus og ég held að það sé jafnvel hægt að segja að ég hafi orðið fyrir öfugu menningarsjokki. Ég horfði nefnilega á þátt þeirra Karenar og Manuelu þar sem þær fylgjast með Sif Aradóttur, ungfrú Ísland taka þátt í Miss Universe keppninni. Ég get með nokkurri vissu sagt að þarna er á ferðinni versta dagskrárgerð sem sést hefur í íslensku sjónvarpi. Heimskudýrkunin er algjör og þær stöllur hafa ekkert fram að færa. Algjörlega innantómur þáttur. Ég veit ekki hvort ég er orðinn svona gamall eða hvað það er, en mér finnst til dæmis eðlileg krafa þegar fólk er ráðið til að gera sjónvarpsþátt að það hafi meiri málþroska en meðal fimm ára barn. Þá finnst mér að það skipti miklu máli þegar er verið að gera þátt að einhver setjist niður og hugsi aðeins um það, hvort það sé yfir höfuð eitthvað sem þessi þáttur hafi fram að færa. Í þessu tilfelli er það nefnilega ekkert.

Þeir sem hafa áhuga á að sjá hvað ég er að tala um geta gert það á vefsíðu þáttarins eða með því að stilla á sjónvarpsstöðina Sirkus klukkan 21:00 í kvöld og næstu kvöld.

Lesa meira »
(Engin ummæli)

Ég held að það sé kominn tími á eitt blogg, sérstaklega þar sem ég er veikur heima og hef ekkert betra að gera. Ég er einn af þeim sem verð alveg ótrúlega sjaldan veikur og ég held að það sé af því að mér leiðist það alveg óskaplega mikið. Ég vil vera á fullu að gera eitthvað frekar en að liggja bara í rúminu allan daginn. En maður verður bara að láta sig hafa það í þessi örfáu skipti sem það gerist. Síðan ég bloggaði síðast hefur ýmislegt gerst. Ég skrifaði forsíðufréttina á Fréttablaði um daginn og hún fékk þvílíka athygli. Þá er ég er búinn að taka viðtöl við allskonar frægakalla og konur í sumar og það er gríðartöff. Tók t.d. viðtal við Gísla Martein í gær. Svo er ég bara búinn að vera að vinna alveg á fullu. Er í tveimur störfum á Fréttablaðinu og svo er ég líka stundum á videóleigunni. Reyndar fékk ég mjög skemmtilega heimsókn einmitt þangað um daginn. Það voru þær Sigga Árdal, Sigga G og Sunna. Sigga færði mér loft í flösku úr Þingeyjarsýslu og mun það eiga stóran þátt í því að ég lifi af sumarið, því Reykjavíkurloftið er ekkert í líkingu við loftið fyrir norðan. Mjög gott mál!

En það hefur ekki allt verið dans á rósum. Um daginn gáfust fallegu grænu skórnir mínir endanlega upp. Ég fékk mér reyndar nýja brúna skó sem er hreint út sagt ekki svo slæmir. Til að vera í stíl þá keypti ég mér líka brúnan bol sem fer vel við skóna.

Um daginn fóru ég Atli og Gunni líka í leynileiðangur út í Gróttu. Kríurnar eru vinir mínir og ég elska máfana. Og talandi um mig og Atla, þá erum við tveir ásamt fleirum alltaf í körfu. Og það gerast líka alltaf einhver ævintýri. Á mánudaginn töpuðum við fyrir guttum sem voru um það bil helmingi minni en við og þó vorum við með risann Gest í okkar liði. Og í fyrradag töpuðum við fyrir öðrum guttum sem voru þó talsvert stærri svo skömmin var ekki eins mikil. Greinilegt að við verðum að herða okkur töluvert.

Ég verð að minnast á þætti sem Vignir á Grensásvideó benti mér á um daginn og heita Arrested Development. Þeir eru alveg hreint frábærir. Í þeim er einn ábyrgur karakter sem þarf að sjá um fjölskyldu sína sem er algjört hyski. Bróðir hans er töframaður, mamman er gjörspillt, sonur hans er skotinn í frænku sinni, systir hans heldur að hún sé umhverfissinni en það gæti ekki verið fjarri lagi og maðurinn hennar heldur að hann sé leikari. Já og ekki má gleyma að fjölskyldufaðirinn er í fangelsi. Ég mæli með því að þið kíkið á þetta.

Og svo var ég að klára að horfa á Kiss kiss bang bang og hún var mjög fín. En ég ætla að hætta núna og lesa Bróður minn ljónshjarta. Yfir og út!

Lesa meira »
(Engin ummæli)