Eftir nokkuð langt hlé frá kvikmyndahúsum seinustu vikur fann ég að það væri kominn tími til að kíkja á eina góða ræmu. Og ekki vitlaust að byrja aftur með krafti og fara á mynd sem fer nánast í flokk með gömlu stórslysamyndunum, The Day after Tomorrow. Það verður að segjast að hún olli mér smá vonbrigðum. Markaðssetning hennar var gríðarlega mikil, svo mikil að það minnti einna helst á æðið í kring um Jurassic Park um árið. Búið var að byggja upp miklar væntingar og það má segja að maður hafi búist við aðeins meiru. Engu að síður var myndin mjög góð og mæli ég með að sem flestir kíki á hana. Stórvinur minn Gísli Berg sá um tæknimál á evrópukynningu myndarinnar sem haldin var á Broadway fyrr í mánuðinum og ekki er það lakur dómur.

Myndin byrjaði dáltið ruglingslega, mjög margar persónur og mikið um að vera en það stóð ekki lengi og maður náði áttum aftur. Aðal söguhetjan er Jack Hall sem er vísindamaður og fáum við að sjá atburðarásina útfrá bæði störfum hans sem vísindamans og einnig í gegnum augu fjölskyldumannsins en fjölskylda hans skipar stórt hlutverk í myndinni. Fyrrverandi kona Hall er hjúkrunarkona og gegnum hana fáum við eitt sjónarhorn og sonur hans er í keppnisferð og við fylgjumst einnig með honum og vinum hans. Af leikurum myndarinnar tók ég mest eftir hinni átján ára Emmy Rossum, mjög heillandi stúlku sem fór með hlutverk draumastúlku sonar Hall. Ég vona að við fáum að sjá hana í fleiri myndum á næstunni. Tæknibrellur skipa gríðarstórann sess og finnst mér þær hafa tekist mjög vel. Einnig er ljóst að vísindamenn hafa verið í ráðum við gerð myndarinnar því í grunninn eru flestir þættir myndarinnar réttir vísindalega þó svo að þeir séu ýktir mjög, en það er nú hluti af því að segja góða sögu. Ég mæli með myndinni, enda er þarna tæknilegt stórvirki á ferð.

Lesa meira »
(Engin ummæli)

Kvikmynd mánaðarins á BíóBlog.tk er að þessu sinni myndin The Virgin Suicides eftir Sofiu Coppola. Tveir heppnir þáttakendur fá hana að launum fyrir rétt svör í getrauninni.

Spurningar:
#1 Hanna R. Hall fer með hlutverk Ceciliu Lisbon í myndinni Virgin Suicides frá árinu 1999. Hvaða óskarsverðlaunamynd lék hún í árið 1994 og hvað var hún gömul þá?

#2 Sofia Coppola leikstýrir myndinni Virgin Suicides. Hún hefur einnig leikið í nokkrum myndum, m.a. mynd föður síns The Godfather frá árinu 1972. Hvað var hún gömul þegar hún lék í Godfather og hver er faðir hennar?

#3 Höfundur sögunnar The Virgin Suicides, Jeffrey Eugenides vann til Pulitzer verðlauna árið 2002 fyrir aðra skáldsögu. Hvaða skáldsaga var það?

#4 Hvaða ár var myndin The Virgin Suicides framleidd?

Svör sendist á netfangið hnefill@hotmail.com
Vinningshafinn verður tilkynntur hér á síðunni mánudaginn 1. júní 2004.

Svörin má öll finna á vefsíðunum www.bioblog.tk og www.imdb.com

Sigurvegarar:
Uppfært 1. júní 2004

Alls tóku 47 þátt. Þar af voru 45 með öll svör rétt. Af þáttakendum voru 5 sem ég þekkti með nafni, enginn þeirra vann. Sigurvegarar í maí eru hinsvegar:

Jakob Einar Úlfarsson
Kristófer Dignus Pétursson

Ég óska ykkur til hamingju og þakka ykkur öllum fyrir þáttökuna. Ný getraun kemur inn á næstu dögum.

- Örlygur Hnefill

Lesa meira »
(Engin ummæli)

Til að svala forvitni minni ákvað ég að skella mér á eina rússneska kvikmyndasýningu í MÍR. Þetta var síðasta sýning vetrarins og var það ræman Ne valyai duraka sem var á dagskrá kvöldsins.

Myndin var ótextuð og á rússnensku en þrátt fyrir það hafði ég mjög gaman af henni. Ég get nú ekki sagt til um söguþráðinn en í myndinni var mikið áfengi, dans og harmonikkuspil, ung og fögur stúlka og bandarískur njósnakafbátur.

Ég gef myndinni 2 og hálfa stjörnu og sýningasal MÍR gef ég 4 stjörnur. Þetta er eitthvað sem allir áhugamenn um kvikmyndir ættu að kíkja á.

Lesa meira »
(Engin ummæli)