Í dag ganga Reykvíkingar að kjörborðinu til að kjósa um framtíð Reykjavíkurflugvallar, miðstöðvar íslensks innanlandsflugs. Er þar kosið til mjög langrar framtíðar, enda verður ekkert aðhafst fyrr en að 15 árum liðnum. Það er hinsvegar ljóst að úrslit þessara kosninga hefa mikil áhrif, ekki bara á borgarskipulag Reykjavíkur, heldur einnig á framtíð innanlandsflugs. Komið hefur fram að innanlandsflug stendur mjög höllum fæti um þessar mundir og stendur ekki undir kostnaði. Það ætti öllum að vera ljóst, hversu mikilvægt það er fyrir íbúa landsbyggðarinnar að flugsamgöngur haldist. Það hefur sýnt sig að ástandið hefur versnað þegar flugsamgöngur hafa lagst af og má þar t.d. nefna Húsavík og fækkar innlendum áfangastöðum stöðugt.

Það hlýtur að teljast fremur undarlegt að í þessari kosningu skuli rödd landsbyggðarfólks ekki fá að njóta sín. Það er ljóst að flugvöllurinn og framtíðarstaðsetning hans skiptir miklu í þróun byggðamála. Það eru íbúar landsbyggðarinnar sem nota flugvöllin manna mest og því væri eðlilegt að okkur væri gefinn einhver kostur á að hafa áhrif. Flestir hafa fullan skilning á rökum flugvallarandstæðinga, hvað varðar landnýtingu og hljóðmengun. Það er mjög gott byggingarsvæði sem fer til spillis vegna flugvallarins. Hinsvegar hefur staðsetning flugvallarins líka góð áhrif fyrir Reykvíkinga. Það gerir fólki hægar um vik, t.d ef Reykvíkingar þurfa að fara út á land. Öryggisþáttur flugvallarins er einnig gríðarlegur og staðsetning hans í grennd við sjúkrahús er mjög ákjósanleg.

Það er Reykjavík sem höfuðborg Íslands mjög nauðsynlegt að þar sé flugvöllur. Verði innanlandsflug flutt til Keflavíkur mun það líklegast leggjast af. Þá er jafnvel fljótlegra að keyra. Þetta er mikið hitamál og skiptir miklu fyrir framtíð landsbyggðarinnar. Ég skora því á allt atkvæðisfært fólk að nýta sér kosningarétt sinn í dag svo við fáum sem heildstæðasta niðurstöðu.

Lesa meira »
(Engin ummæli)

Nú er um hálfur mánuður þar til landsþing Framsóknarflokksins fer fram og mikil spenna er um hverjir verði í kjöri til stjórnar flokksins. Mest spenna ríkir vegna varaformannskjörs, en eins og kunnugt er lætur Finnur Ingólfsson, fyrrverandi ráðherra af því embætti nú. Margir hafa að undanförnu verið nefndir til leiks og um tíma var hálfur þingflokkurinn að stefna að varaformennsku. Nú eru hins vegar bara tveir sem hafa gefið kost á sér, þeir Guðni Ágústsson, landbúnaðarráðherra og Ólafur Örn Haraldsson, þingmaður. Jónína Bjartmarz er einnig orðin mjög heit fyrir slagnum. Margir bjuggust einnig við að Siv Friðleifs myndi endurtaka leikinn en svo er ekki. Hefur hún ákveðið að fara í ritaraslaginn á móti Hjálmari Árnasyni. Merkilegt er að allt þetta fólk er í þingflokki Framsóknar og verður manni þá á að spyrja hvort ekki sé mikið mannval utan hans.

Líka vekur athygli manns að þrátt fyrir mikla fjölmiðlaathygli hefur fylgi flokksins ekki aukist neitt frá síðustu könnun, ef marka má nýja Gallup-könnun. Það hefði óneitanllega mátt búast við að flokkurinn færi upp í kringum landsþingið en svo virðist ekki vera. Framsóknarflokkurinn er nú búinn að sitja í ríkisstjórn með Sjálfstæðisflokkum í hátt í 6 ár og hefur það sýnt sig gegnum tíðina að stjórnarsamstarf við Sjálfstæðismenn er ekki gott fyrir fylgi þeirra. Það skiptir því miklu máli hverjir veljast í forustusveit flokksins. Þangað þarf að veljast fólk sem þorir að gera breytingar. Mun vænlegra væri fyrir Framsókn að fara í samstarf með Samfylkingunni og Vinstri-grænum. Framsóknarflokkurinn ræður miklu um hvernig ríkisstjórn verður mynduð eftir næstu kosningar. Það er því ekki bara mikilvægt á þeim bænum, heldur líka fyrir vinstri vænginn í stjórnmálunum að vel veljist til forystu.

Lesa meira »
(Engin ummæli)