Nú í kvöld mun íslenska þjóðin velja framlag sitt í Söngvakeppni evrópskra sjónvarpsstöðva í beinni útsendingu Sjónvarpsins. Eru þar kynnt nokkur lög, misgóð þó, en eitt eiga þau öll sameiginlegt, þau eru öll sungin á íslensku. Ákvörðun var tekin um það hjá Ríkisútvarpinu fyrir nokkru að framlag Íslendinga skyldi flutt á íslensku og væri þar með íslenskri tungu lyft á háan stall á hinum alþjóðlega vettvangi. Eflaust má færa einhver falleg rök fyrir því að flytja íslenska framlagið á íslensku en staðreyndin er hins vegar sú að þarna er um keppni að ræða þar sem fólkið í Evrópu velur sigurvegarann. Hversu mörg prósentubrot af áhorfendum keppninnar ætli séu íslenskumælandi?

Með því að skylda íslensku þátttakendurna til að flytja sitt framlag á íslensku er búið að gera út um allar vonir um íslenskan stórsigur í Júróvisjón. Til margra ára var þjóðum skylt að syngja á sínu móðurmáli en það hefur verið afnumið vegna þess að það var talið mismuna þátttakendum. Enda sýndi það sig að Íslendinagar sem lengi hafa borið þann kross að syngja á ástkæra ylhýra móðurmálinu lentu í öðru sæti fyrsta árið sem framlag okkar var flutt á ensku. Því er vert að spyrja hvort þetta sé rétti vettvangurinn fyrir móðurmálsstefnuna? Væri ekki viturlegra að heyja þá baráttu á innlendum vettvangi með því að bæta t.d. málfar í fjölmiðlum?

Sigur í Júróvisjón hefur í för með sér gríðarlega landkynningu og það hefur sýnt sig að ef vel er unnið í kynningarmálum, og ekki sýst ef um gott lag með texta sem höfðar til fólks er að ræða þá virkar það vel sem landkynning á alþjóðavettvangi. Það væri því vænlegra fyrir markaðssetningu á Íslandi að syngja á ensku.

Lesa meira »
(Engin ummæli)

Næstu alþingiskosningar verða þær fyrstu þar sem kosið verður eftir nýrri kjördæmaskipan. Sumir segja að þær verði einnig þær síðustu þar sem kosið verði eftir hinum nýju kjördæmum og að nú styttist í að landið verði að einu kjördæmi. En hvaða áhrif hefur þessi kjördæmabreyting? Öllum er ljóst að mikil uppstokkun verður á flokksstarfi. Þingmönnum fækkar á landsbyggðinni en fjölgar á höfuðborgarsvæðinu og ekki eru allir sáttir. Landsbyggðin hefur átt mjög undir högg að sækja og mörgum finnst erfitt að réttlæta að þingmönnum þar verði fækkað. Á móti kemur að erfitt er að réttlæta það misvægi atkvæða sem skapast hefur á undanförnum árum.

Kraftmikið starf á netinu
Ljóst er að með stærri kjördæmum verða að koma til nýjar leiðir í samskiptum kjósenda og umbjóðenda þeirra. Þar kemur Netið til með að skipa stóran sess. Miklar vegalengdir í hinum nýju kjördæmum setja Netinu engin takmörk. Samfylkingin hefur þegar rutt brautina á því sviði með öflugu starfi á vefnum. Þar má nefna heimasíðurnar Samfylking.is, Pólitík.is, og Stólpa.com auk þess sem margir í framvarðasveit flokksins halda út eigin vefsíðum.

Samband kjósenda við þingmenn
Auk þess koma fundaferðir þingmanna um kjördæmin líklega til með að verða fyrirferðarmeiri í hinum nýju kjördæmum. Nú á næstu dögum hefst fundaherferð Össurar Skarphéðinssonar og Margrétar Frímannsdóttur, formanns og varaformanns Samfylkingarinnar. Þetta er önnur fundaherferð þeirra um landið, en áður hefur þingflokkurinn allur lagt land undir fót og farið út um landið. Ferðir af þessu tagi eru líka mjög af hinu góða og efla samheldni flokksmanna. Það er öllum stjórnmálahreyfingum mikilvægt að vera í góðu sambandi við kjósendur sína og ferðir sem þessi eru ekki bara til gagns fyrir þá sem sækja fundina heldur nýtast þær einig vel fyrir þingmenn til að kanna hljóðið í sínu fólki. Það er nefnilega svo mikilsvert að kjósendur hafi greiðan aðgang að umbjóðendum sínum og öfugt.

Lesa meira »
(Engin ummæli)