Byggðamál voru mikið í umræðunni fyrir ekki löngu síðan. Umræða varð hvað mest í kringum síðustu alþingiskosningar, en svo virðist sem nú hafi dregið úr. Ríkisstjórn Davíðs Oddsonar hefur nú lengst allra ríkisstjórna stýrt þessum málum og má segja að það hafi ekki gengið sérlega vel. Svo er komið að stunduð eru pólitísk hrossakaup til að losa Sjálfstæðisflokkinn undan ábyrgð í þessum málum og hefur þessi málaflokkur verið færður til Framsóknar. En hvað er til ráða? Það er kominn tími á að nýtt fólk taki við stjórnartaumunum. Fólk sem hefur nýja sýn á framtíð landsbyggðarinnar og treystir sér til að fara ótroðnar slóðir.

Gagnleg samvinna
Eitt af því sem vert er að skoða, eru þau áhrif sem innganga í Evrópusambandið hefði á stöðu landsbyggðarinnar. Í Rómarsáttmálanum er skýrt kveðið á um að leitast skuli við að styrkja dreifðar byggðir og jaðarsvæði. Ljóst er að Ísland mun sérstaklega njóta góðs af þessum styrkjum, sökum þess hversu dreifbýlt landið er. Auk þess getur sú áhersla sem ESB leggur á menntamál orðið landsbyggðinni mjög til framdráttar. Það eru stór tækifæri fyrir landsbyggðina fólgin í menntakerfinu.

Nýsköpun
Einnig er vert að styðja við bakið á því fólki sem er að vinna að nýsköpun á landsbyggðinni. Mikið er af hæfileikaríku fólki með góðar hugmyndir sem þarf aðstoð við að komast af stað. Það er hægt að skapa fjölda nýrra starfa í tækni-iðnaði og ýmis konar gagnavinnslu á landsbyggðinni.
Það er bara spurning um hvernig haldið er á spilunum. Með því að nýta vel þau tækifæri sem bjóðast er hægt að styrkja landsbyggðina mikið. Það er kominn tími til að breyta.

Lesa meira »
(Engin ummæli)

Undanfarin ár hefur tölvunotkun í framhaldsskólum aukist til muna. Gerðar eru auknar kröfur til nemanda um að skila verkefnum á tölvutæku formi. Það er hinsvegar staðreynd að fæstir skólar hafa nægan fjölda af tölvum til að anna eftirspurn nemenda og oft er mikið álag á tölvukerfum skólanna þegar stór verkefnaskil nálgast. Því er spurning hvort ekki sé þörf á að auka það fjármagn sem ríkið leggur til kaupa á tækjum og búnaði og þá að skilgreina sérstaklega fjármagn sem færi til tölvukaupa. Sú upphæð yrði miðuð við fjölda nemenda og sett væru ákveðin viðmið um hversu margir nemendur skuli vera um hverja tölvu.

Það eru flestir búnir á átta sig á því að það er í hag fyrir þjóðfélagið að til sé, vel menntað fólk á öllum sviðum. Góð tölvukunnátta er einnig nauðsynleg í flestum nýrri atvinnugreinum og fært fólk á því sviði mjög eftirsóknarvert. Í ályktun Ungra jafnaðarmanna um Menntamál frá síðasta landsfundi segir meðal annars að forsendur þess að menntun geti talist góð séu þær að menntun búi þá sem hennar njóta undir líf og störf í flóknu upplýsingasamfélagi nútímanns. Það er öllum ljóst að þörfin er mikil og því hlýtur að fylgja aukinn kostnaður þegar verið er að ganga gegnum jafn miklar breytingar og upplýsingatækni hefur í för með sér.

Lesa meira »
(Engin ummæli)

Þessari spurningu er ekki vanþörf á að varpa fram. Hvers vegna ætti ungt fólk á Íslandi að telja hag sínum betur borgið innan veggja Evrópusambandsins heldur en fyrir utan. Ljóst er að verði sú leið valin að ganga í ESB mun það hafa mismunandi áhrif á ýmsa þjóðfélagshópa. Ungt fólk hefur nú í auknum mæli myndað sér skoðanir á þessum málum. Við lifum á tækniöld og það telst ekki lengur til forréttinda að hljóta menntun, heldur til mannréttinda. Því er mikilvægt að nýta öll tækifæri sem bjóðast til að efla og bæta aðstöðu og aðgang að gagnlegu námi. Með því móti verða einnig til mikil verðmæti, fólgin í mannauði.

Á vegum Evrópusambandsins eru í gangi spennandi verkefni sem ungt fólk getur tekið þátt í. Þessum verkefnum er ætlað að styrkja og styðja við ungt fólk á sviði menntunar, alþjóðasamskipta og að veita ungu fólki innsýn í ólíka menningarheima. Þessi verkefni ganga undir nafninu ,,Styrkjaáætlun Evrópusambandsins” og eru þau fimm talsins.

Verkefnin stuðla að því að auka tækifæri í menntun með þátttöku í samevrópskum verkefnum, vinna gegn mismunun og fordómum og gefa ungu fólki tækifæri til að auka hæfni sína. Verkefnin eru fjármögnuð af Evrópusambandinu. Þetta er einn af mörgum kostum sem ungu fólki er boðið upp á. Hægt er að fræðast meira á um þessi verkefni á vefsíðu Evrópusambandsins.

Lesa meira »
(Engin ummæli)

Þeir sem vilja kynna sér málefni er varða Evrópusamvinnu og hvaða áhrif hún hefur á Íslendinga geta nýtt sér netið mikið. Þar er að finna mikinn fjölda af vefsíðum sem fjalla um ESB, bæði innlendum og erlendum. Evrópuumræðan er mikið að koma til hér á landi, þó enn sé hún á bannlista hjá sumum stjórnmálaflokkum. Það er þess vegna sem hún er mikilvæg fyrir okkur, Íslendinga, og ættu því sem flestir að kynna sér hvað er hér á ferðinni. Því verður hér bent á nokkrar vefsíður sem geta komið áhugasömum að notum:

Evrópuvefur Samfylkingarinnar
Á vefsíðu Samfylkingarinnar er að finna sérstakan Evrópuvef. Undir honum er líka skemmtilegur spjallveggur þar sem lesendur síðunnar geta komið skoðunum sínum á framfær.

Vefsíða Evrópusambandsins
Þetta er opinber vefsíða Evrópusambandsins. Þar er hægt að lesa fréttir, fræðast um stefnur sambandsins og margt fleira. Síðan er á mörgum tungumálum og er mjög gagnleg fyrir fróðleiksfúsa.

Greinasafn Evrópusamtakana
Á vefsíðu Evrópusamtakana er að finna margar greinar um Evrópusambandið og ýmsar aðrar gagnlegar upplýsingar.

Kynningarmiðstöð Evrópusamtakana
Ýmis verkefni er varða rannsóknir og tækniþróun. Miðstöðinni er ætlað að styðja við aðila sem vilja taka þátt í verkefnunum.

Gagnlegar upplýsingar um ESB (á ensku)
Undirvefur á vefsíðu Evropusambandsins sem inniheldur mikið af gagnlegum upplýsingum um sambandið.

Vonandi koma þessar síður þér að góðum notum við að fræðast um gagnsemi og áhrif Evrópusambandsins á Ísland.

Lesa meira »
(Engin ummæli)